Entamu

Los díes 23, 24 y 25 d’ochobre la Fundación Andreu Nin (FAN) entama los sos III Alcuentros, na ciudá de Xixón nesti casu.

En Sigüenza (2007), fiximos alcordanza de los combatientes —y sobre manera de la mocedá— que nel branu de 1936 defendieron esi llugar del ataque de la tropa fascista y, tamién, de la institución revolucionaria y espontánea que foron les Milicies Obreres, salvadores d’una república que nada nun fizo por salvase.

Un añu dempués, en Sariñena (2008), pelos montes d’Huesca, na fastera’l frente ocupada poles milicies del POUM (XXIX División tres la militarización), falamos de George Orwell y de munchos otros internacionalistes comprometíos cola Revolución española.

En dambos casos alcontramos el mesmu tresfondu: la venceya ente guerra y revolución, socialismu o fascismu, Frente Popular o poder revolucionariu de los trabayadores y de les sos organizaciones…

Alderiques que, en resumíes cuentes, allúguense nel calter d’esta Fundación y dexen vindicar la memoria revolucionaria de la xente que lluchó por una sociedá ensin amos.

Agora, en Xixón.

Nel mes d’ochobre recuérdase’l 75 aniversariu de la Revolución d’Asturies, cume del llargu procesu de la revolución social. De magar ochobre del 34 nada nun fue lo mesmo; la querida República, brezu de les más sentíes aspiraciones d’emancipación, declarare la guerra a les clases trabayadores y amenazaba con volvese dictadura fascista. Poro, estos Alcuentros faen homenax a un movimientu obreru singular, que foi exemplu pa tol proyeutu socialista na so dómina.

Una rexón industrializada (minería, siderurxa, fábriques d’armes, producción d’esplosivos, construcción de barcos, …) que tenía’l nivel de vida más altu de la España republicana, coles tases más baxes d’analfabetismu, con una clas obrera alvertida, organizada y avezada a los conflictos, con pocu enclín a les aventures y enemiga del oportunismu. La política d’Aliances Obreres —que sofitaben el BOC y la ICE— atopó neses tierres un tarrén granible pal so desarrollu. Primero la UXT y la CNT, llueu’l PSOE, dempués el BOC y la ICE. Namái la FAI y el PCE refugaben axuntase a elles hasta’l 5 d’ochobre, el día que’l movimientu revolucionariu españó nes cuenques mineres.

Esta xuntura vencéyase coles sigles UHP. Les ciudaes y pueblos, les fábriques y les empreses van llarándose d’una rede bien mesta de Xuntes de l’Alianza Obrera, preparaes pa cumplir les funciones de conceyu unitariu del muérganu insurreccional y de guañu del nuevu Estáu Revolucionariu. A lo llargo de quince díes llucharon por una sociedá nueva, ablucaron al movimientu obreru internacional y nun dexaron asitiase a una dictadura fascista pola que naguaben les vieyes clases dominantes y parasitaries. La derrota abrió’l pasu a una represión terrorista d’algame desconocíu hasta entós; mentanto, d’un requexu a otru del país el nome d’Asturies viaxaba pronunciáu con arguyu poles clases obreres, anuncia clara d’un desquite por venir.

Esto, que nun ye poco, ye de lo que queremos facer alcordanza con respetu y almiración.